Հասարակություն - Որևէ տեխնածին աղետ տեղի չի ունեցել, վթարն ուղղակի խոշոր է եղել, հնարավոր է՝ 1 ժամվա ընթացքում ամբողջ հանրապետությունում էներգամատակարարումը վերականգնվի. փոխնախարար (տեսանյութ)

Անհանգստանալու որևէ բան չկա, որևէ տեխնածին աղետ տեղի չի ունեցել, չի էլ կարող ունենալ: Վթարն ուղղակի խոշոր է եղել, ամենախոշորը 2013 թ-ից սկսված: Տատանումները մեծ են եղել, դա ամբողջ էներգահամակարգի վրա ազդել է: Այս մասին հայտարարեց ՀՀ տարածքային կառավարման և ենթակառուցվածքների փոխնախարար Հակոբ Վարդանյանը հանրապետությունում էլեկտրաէներգետիկ համակարգի խափանումների թեմայով հրավիրված հրատապ ասուլիսի ժամանակ:

Նա նշեց, որ ժամը 1:46 րոպեին հաճախականության տատանում է եղել ամբողջ համակարգում, որի հետևանքով անջատվել է Հրազդանի 5-րդ բլոկը, հետո Երևան ՋԷԿ-ը և ապա փոքր կայանները: Հաճախականության տատանումները շարունակական բնույթ են կրել, և այս պահին դեռևս հստակ ախտորոշված չէ պատճառը:

«Բայց կայունությունը վերականգնված է, տատանումներ չունենք, էներգահամակարգի արտադրական հզորության մատակարարումը վերականգնում է»,-ասաց նա:

Հակոբ Վարդանյանը նշեց, որ համակարգը սինխրոն կապի միջոցով կապված է իրանական էներգահամակարգի հետ՝ ՀՀ-ում ցանկացած տանում Իրանում է զգացվում և հակառակը:

«Վարկածներից մեկն այն է, որ հաճախականության հզոր տատանումը եկել է իրանական էներգահամակարգում տեղի ունեցած վթարից: Մենք մեր իրանցի գործընկների հետ կապի մեջ ենք եղել, նույն ժամանակահատվածում իրենց մոտ էլ են տեղի ունեցել տատանումներ: Բայց ասել, որ վթարի պատճառը 100 տոկոսով եկել է իրանական էներգահամակարգից, չեն կարող»,-ասաց նա:

Փոխնախարարի խոսքով՝ ուսումնասիրություններ կկատարվեն, պատճառները և մեղավորները կբացահայտվեն:

Ինչ վերաբերում է համակարգում արտադրությանը, ասաց, որ այս պահին հիմնական բազիսային արտադրող կայանները Հրազդանի 5-րդ բլոկն է, Երևանի ՋԷԿ-ը, ինչպես նաև ՀԷԿ-երը:

«Ատոմակայանը պլանային վերանորոգման է կանգնած հունիսի մեկից և ցանցում չի եղել, ցանցից միայն օգտվել է սեփական կարիքների համար: Ատոմակայանի անձնակազմը, պահպանելով բոլոր նորմատիվները, հաճախականության տատանման սկսվելուն պես ցանցից անջատվել են և սեփական կարիքները բավարարել սեփական դիզել գեներատորների միջոցով: Կայունացումից հետո նորից սկսել են սնվել համակարգից»,-ասաց նա:

Հակոբ Վարդանյանը նաև տեղեկացրեց, որ այս պահին Լոռու և Տավուշի մարզի մի մասը անջատել են ՀՀ-ի էներգահամակարգից և միացրել վրացական էներգահամակարգին. մարզերի մատակարարումը վերականգնված է:

«Այս պահին Վրաստանից 28 մեգավատ ներմուծում ունենք, 42 մեգավատ Իրանից, ընդհանուր այս պահին սպառումը՝ 583 մեգավատ վերականգնված է: Օրվա այս ժամերին մեր մոտ սպառման պահանաջարկը լինում է 800-850, մաքսիմալը՝ 900 մեգավատ: Այս պահին մոտ 600 մեգավատ ապահովվում է: Սևան-Հրազդան կասկադը ամբողջ հնարավորությամբ գործող ջրի քանակով մտած է համակարգ, որը ևս անջատված էր, Որոտանի կասկադը և փոքր ՀԷԿ-երը ևս: Մնացել է Հրազդանի ՋԷԿ-ի 5-րդ բլոկը և Երևան ՋԷԿ-ը, որտեղ զննության աշխատանքներ են կատարվում և վթարը վերականգնողական աշխատանքներ»,-ասաց նա:

Փոխնախարարի խոսքով՝ մոտավորապես մեկ ժամվա ընթացքում, եթե նոր տատանումներ չլինեն, 5-րդ բլոկի շոգետուրբինը կարող է մտնել ցանց:

«Այդ ժամանակ ամբողջ հանրապետությունում էներգամատակարարումը կվերականգնվի և որևէ մեկը չի զգա վթարի հետևանքները»,-ասաց նա:

 


tert.am

Լրահոս

Ֆոտոռեպորտաժ

«Երևանյան գույներ»

Հարցումներ