Քաղաքական - Ովքե՞ր են սեւազգեստ խմբերում. Օսիպյանը հավաստիացրեց՝ վախենալու պատճառ չկա

Կան մարդիկ, որոնք փորձում են ինքնահաստատվել եւ ինքնադրսեւորվել, դրանով ցույց տալ, որ իրենք կարող են ամեն ինչ իրենց թույլ տալ Հայաստանի Հանրապետությունում, բայց վստահեցնում եմ ձեզ դա ընդամենը իրենց կարծիքն է։ Այս մասին այսօր՝  հունիսի 6-ին, լրագրողների հետ զրույցում ասաց ՀՀ ոստիկանապետ Վալերի Օսիպյանը՝ արձագանքելով դիտարկմանը, որ ՀՀ վարչապետ Նիկոլ Փաշինյանը կարծես թե դժգոհ է ոստիկանների գործողություններից ՀԱԿ ակտիվիստ Վարդան Հարությունյանին ՀՅԴ–ականների կողմից ծեծի ենթարկելու առնչությամբ։

«ՀՀ–ում անթույլատրելի եմ համարում բռնության կոչը, իսկ բռնության կոչեր անողները կարժանան օրենքի սահմաններում իրավապահ մարմինների կոշտ արձագանքին»,–նշեց նա։

 

Մեկ այլ հարցին, թե կառավարության նիստում ինչ օպերատիվ տվյալներ նկատի ուներ վարչապետը, երբ խոսում էր սեւազգեստ խմբերի մասին, այդ խմբերը վախի մթնոլորտ են ցանկանում արդյոք ստեղծել, Օսիպյանն ասաց. «Որեւէ վախի մթնոլորտ չկա, որեւէ վախենալու պատճառ չկա, մեր քաղաքացիներն ապահովված են, ՀՀ–ն ապահով երկրներից մեկն է, օպերատիվ տղեկությունները հրապարակման ենթակա չեն»։

Հարցին, որ քաղաքական ուժին նկատի ուներ վարչապետը, ոստիկանապետը պարզաբանեց. «Մեզ համար կապ չունի, որ քաղաքական ուժը ուզում է լինի»։

Դիտարկմանը, թե ոստիկանության գործողությունները թավշյա են, հենց վարչապետն էլ է դժգոհություն հայտնում, Օսիպյանը ի պատասխան հարցրեց.

«Ի՞նչ չի արել ոստիկանությունը, որ դուք կուզենայիք տեսնել։ Ես վարչապետի հետ առանձնազրույց եմ ունեցել, որի մասին տեղեկություն չեմ հայտնի»։

Հարցին՝ առանձնազրույցի ժամանակ վարչապետը չդժգոհե՞ց ոստիկանության գործողություններից, ոստիկանապետը խորհուրդ տվեց այդ հարցով դիմել վարչապետին։

«Ոստիկանությունը արել է ամեն ինչ օրենքի սահմաններում, ես չեմ բացառում, որ մեր գործողությունների մեջ լինեն բացթողումներ, բայց, ընդհանուր առմամբ ,ոստիակնությունն իր առաջ դրված պարտականությունները կատարել է»,–նշեց ոստիկանապետը։

Լրագրողները հետաքրքրվեցին մեքենայի դրիֆթներն ու «ճռիկները» շատացել են, որին ի պատասխան նա հավաստիացրեց, որ դրանք միշտ էլ եղել են։

Իսկ դիտարկմանը, որ նախկինում Ազատության հրապարակում չի եղել, Օսիպյանը հակադարձեց՝ եղել է. «Մի անգամ էլ 17 մեքենա եմ ուղարկել տուգանային հրապարակ, դա մի դեպք եմ ասում, բայց շատ են եղել դեպքեր։ Այսօր գիշերը եւս արձանագրություն են կազմվել»։

Ոստիկանապետը, սակայն չի կարծում, թե դրանք սաբոտաժի նպատակով են արվում. «Քաղաքացիներ են, որ մտածել են, որ կարող  են մտնել Ազատության հրապարակ, քանի որ մինչեւ 24.00–ն է հսկվում»։

Հիշեցնենք, որ Նիկոլ Փաշինյանը կառավարության նիստում նշել է, որ օպերատիվ տեղեկություններ կան, որ որոշ շրջանակներ որոշել են սեւազգեստ մարդկանց խմբեր ձեւավորել, որոնք քաղաքում կշրջեն ու որոշակի տրամադրություն կփորձեն ստեղծել՝ լկտի պահվածքով աչքի ընկնել եւ այլն:

 news.am

 

Լրահոս

Ֆոտոռեպորտաժ

«Երևանյան գույներ»

Հարցումներ