Քաղաքական - Անցկացվել է ԱՊՀ հակաօդային պաշտպանության համադրման կոմիտեի հոբելյանական նիստը

ՀՀ ՊՆ վարչական համալիրում այսօր՝ ապրիլի 9-ին անցկացվել է ԱՊՀ անդամ պետությունների պաշտպանության նախարարների խորհրդին առընթեր հակաօդային պաշտպանության համադրման կոմիտեի 50-րդ հոբելյանական նիստը: Այս մասին հայտնում են ՀՀ ՊՆ մամուլի ծառայությունից։

ԱՊՀ անդամ պետությունների պաշտպանության նախարարների խորհրդի 2019թ. աշխատանքային պլանի համաձայն անցկացված նիստին մասնակցել են Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի, Ուզբեկստանի պաշտպանական գերատեսչությունների, ԱՊՀ պաշտպանության նախարարների խորհրդի քարտուղարության, ռազմարդյունաբերական ձեռնարկությունների ներկայացուցիչներ, ԱՊՀ երկրների ՀՕՊ խնդիրների հետազոտման եւ կադրերի պատրաստման բազային կազմակերպությունների ղեկավարներ:

Հոբելյանական նիստի բացմանը մասնակցել է ՀՀ ԶՈՒ գլխավոր շտաբի պետ, գեներալ-լեյտենանտ Արտակ Դավթյանը։ Կարեւորելով ԱՊՀ անդամ պետությունների ՀՕՊ համադրման կոմիտեի աշխատանքները, ՀՀ ԶՈՒ գլխավոր շտաբի պետն ընդգծել է, որ փոխգործակցությունը նպաստում է ՀՕՊ ուժերի պատրաստության եւ ԱՊՀ պետությունների օդային սահմանների հուսալի պաշտպանության ամրապնդմանը։

Նիստի ընթացքում ամփոփել են 2018 թ.-ին համադրման կոմիտեի իրականացրած աշխատանքները, քննարկվել 2019թ.-ին ԱՊՀ ՀՕՊ միասնական համակարգի մարտական եւ մարտավարական պատրաստության միջոցառումների կազմակերպման եւ անցկացման հարցեր: Ուսումնասիրվել եւ հավանության է արժանացել օգոստոս-սեպտեմբեր ամիսներին Ռուսաստանի եւ Ղազախստանի տարածքում կայանալիք «Մարտական համագործակցություն-2019» համատեղ զորավարժության մտահղացումը:

Նիստի ընթացքում քննարկվել են նաեւ ԱՊՀ ՀՕՊ համակարգի կատարելագործման ու զարգացման հիմնական ուղղությունները, հակաօդային պաշտպանության խնդիրներին վերաբերող այլ հարցեր:

Լրահոս

Ֆոտոռեպորտաժ

«Երևանյան գույներ»

Հարցումներ