Հասարակություն - Հայտնաբերված սպիտակագլուխ անգղի թռչելու հավանականությունը զրոյական է. նրան հասցրել են Երեւան

Տավուշում հայտնաբերված սպիտակագլուխ անգղը տեղափոխվել է Երեւանի կենդանաբանական այգու բուժսպասարկման կենտրոն:

Այս առնչությամբ ՀՀ բնապահպանության նախարարության տարածած հաղորդագրության մեջ ասվում է. «ՀՀ Տավուշի մարզի Ներքին Կարմիրաղբյուր գյուղի բնակիչ, ՀՀ ԶՈւ ռազմական ոստիկանության աշխատակից Արթուր Առաքելյանը հոկտեմբերի 25-ին զանգահարել է ՀՀ բնապահպանութան նախարարություն եւ տեղեկացրել, որ սարամասում հայտնաբերել է սպիտակագլուխ անգղ` տկար վիճակում, թռչելու անընդունակ: Ա. Առաքելյանը հայտնել է, որ անգղը տեղափոխել է իր բնակարան եւ խնդրել միջոցներ ձեռնարկել կարմիրգրքային թռչունին օգնություն ցուցաբերելու համար: ՀՀ բնապահպանության նախարար Ա. Մինասյանը հեռախոսազրույց է ունեցել ՀՀ ԶՈւ ռազմական ոստիկանության Տավուշի բաժնի պետ Ա. Ղազարյանի հետ, տեղեկացել անգղի վիճակի մասին եւ քննարկել տեղափոխման հարցերը:

ՀՀ բնապահպանության նախարարությունից ահազանգը փոխանցվել է  Բնապահպանության եւ ընդերքի տեսչական մարմին: Տեսչական մարնի ղեկավար Ե. Տերտերյանը հանձնարարել է մարմնի Տավուշի տարածքային բաժնի պետին ապահովել անգղի տեղափոխումը Երեւանի կենդանաբանական այգի` անհրաժեշտ անասնաբուժական օգնություն ցուցաբերելու նպատակով: Տավուշի տարածքային բաժնի պետը եւ ՀՀ ԶՈւ ՌՈ աշխատակիցները, կատարելով Կենդանաբանական այգու աշխատակիցների մասնագիտական ցուցումները, սպիտակագլուխ անգղին տեղափոխել են Երեւանի կենդանաբանական այգի:

Սպիտակագլուխ անգղը հոկտեմբերի 26-ի գիշերը հասցվել է Երեւանի կենդանաբանական այգու կենդանիների բուժսպասարկման կենտրոն։ Մասնագետները, որոնց թվում է եղել նաեւ Ֆինլանդիայից  ՀՀ ժամանած կենդանաբույժը, նախնական զննում են իրականացրել։ Ցավազրկող ներարկումից հետո իրականացվել է նաեւ ռենտգեն հետազոտություն: Թռչնի զննության, այդ թվում Ռենտգեն ախտորոշման արդյունքում պարզվել է, որ թռչունն ունի աջ թեւի կոտրվածքներ, այդ վիճում գտնվել է մոտ 20 օր, ինչը դարձել է հյուծվածության պատճառ:  Նախնական դիտարկումներով անգղի մոտ հրազենային վնասվածքներ առկա չեն:

Անգղի վիճակի մասին լիարժեք եզրակացություն հնարավոր կլինի տալ վերականգնողական գործընթացի ընթացքում: Այս պահին թռչնի առողջական վիճակում նկատվում է դրական տեղաշարժ, սակայն մասնագետների փոխանցմամբ նման կոտրվածքների դեպքում թռչելու հավանականությունը զրոյական է:

Լրահոս

Ֆոտոռեպորտաժ

«Երևանյան գույներ»

Հարցումներ