Կրթություն - Հայբուսակ համալսարանը պատասխանում է բոլոր հարցերին մեկ նյութում

Հայբուսակ համալսարանի արձագանքը Lragir.am կայքում հրապարակումներին.

 

«Ծանոթանալով Lragir.am կայքի կողմից Հայբուսակ համալսարանի մասին հրապարակված անհիմն նյութերին, հարկ ենք համարում նշել, որ, ցավոք, մեզ մոտ առողջ մրցակցություն դեռևս չի ձևավորվել և հաճախ այն փոխարինվում է չարախոսությամբ․․․

 

Երևանի Հայբուսակ համալսարանը իր գործունեության 27 տարիների ընթացքում լայն ճանաչում է ստացել Հայաստանում և արտերկրում։ Հավատարիմ մնալով իր որդեգրած սկզբունքներին, միշտ ձգտել է աշխատել բաց և թափանցիկ, մշտապես տեղեկացնելով մեր հանրությանը իր գործունեության մասին, լինելով պատրաստակամ պատասխանել ԶԼՄ-ներին և բոլոր արտաքին շահակիցներին հուզող և հետաքրքրող հարցերին։ Սակայն ձեր կայքում տեղ գտած նյութերը՝ «Հայբուսակը պարբերաբար հայտնվում է միջազգային սկանդալների մեջ, բայց շարունակում է ուսանողներ ներգրավել» և «Իսրայելցի պաշտոնյան Լևոն Ալթունյանի հետ հանդիպմանը դժգոհել է Հայբուսակի կադրերից» նախապես չեն ճշտվել մեզ հետ, հետևաբար, պարունակում են, մեղմ ասած, ապատեղեկատվություն։ Ուստի ստորև ներկայացնում ենք մեր ճշտումները․

 

Իսրայելից ժամանած պաշտոնյաների այցի նպատակներից մեկն էր ծանոթանալ հայաստանյան որոշ ԲՈՒՀ-երի գործունեությանը, այդ թվում և Հայբուսակ համալսարանի։ Մեր համալսարանում տեղի է ունեցել աշխատանքային, կառուցողական հանդիպում, որի ընթացքում Իսրայելի կողմը գոհունակություն է հայտնել բժշկական ֆակուլտետում գործող մասնագիտական կրթական ծրագրերի, դասախոսական կազմի, կլինիկական բազաների տեխնիկական հագեցվածության վերաբերյալ։

 

Հանձնախումբը հայտնել է մեզ, որ մեր շրջանավարտները արդեն իսկ ստացել են մասնագիտական քննություններ հանձնելու իրավունք Իսրայելում և շնորհավորել է մեզ այդ առիթով։ Ինչ վերաբերվում է ինչ-որ 12% հաջողելուն, ապա այդ մասին խոսք չի եղել և չէր կարող լինել, քանի որ քննություն հանձնելու թույլտվությունը եղել է վերջերս և դեռևս արդյունքներ չկան։ Որևէ կեղծ փաստաթղթերի մասին չի խոսվել, որևէ փաստ չի ներկայացվել մեր համալսարանին։ (Ողջ հանդիպումը տեսագրված է)։

 

Ի դեպ մենք Իսրայելի կողմին գրություն չենք գրել բացատրության պահանջով, դրա կարիքը չկա, մենք պարզապես շնորհակալական նամակ ենք ուղարկել Իսրայելի Առողջապահության նախարարություն և պատրաստակամություն հայտնել հետագա համագործակցության համար, որի առաջարկը ստացել ենք իրենցից։

 

Ինչ վերաբերվում է տարիներ առաջ Սիրիայից ժամանած պաշտոնյաների այցին Հայաստան, ապա հարկ է նշել, որ մեր համալսարանի հետ կապված որևէ «սկանդալ» մեզ հայտնի չէ, սկանդալային փաստի մասին մենք տեղեկություն չենք ստացել ոչ Սիրիայի նախարարությունից, ոչ ՀՀ Կրթության և գիտության նախարարությունից։ Թե ինչու Սիրիայից դադարեց ուսանողների հոսքը հարցին, կարծում եմ, ավելի ստույգ կպատասխաներ այդ երկրի Առողջապահության նախարարությունը, որի բարձր պաշտոնյաները 1 տարում բացեցին 2 մասնավոր բժշկական համալսարան․ հետևությունները թողնում ենք ձեզ․․․

 

Հոդվածում նշվում է, որ 2010թ․մեր համալսարանին չի տրվել օտար լեզվով դասավանդելու իրավունք։ Ճիշտ է, չի տրվել, քանզի մենք այն ունենք 2006թ․- ից անժամկետ։ 2010թ․նախարարության կողմից այն անհիմն չեղյալ է համարվել, ներկայում այդ թույլտվության իրավունքը վերականգնված է։

 

Եվ վերջին դրույթը, այն մասին, թե համալսարանը հայտնվել է քննչական մարմինների ուշադրության կենտրոնում օտարերկրյա ուսանողների ընդունելության հարցի հետ կապված․․․Հայտնում ենք ձեզ, որ ՀՀ-ում գործում է օտարերկրյա քաղաքացիների ընդունելության հստակ կանոնակարգը, ըստ որի , օտարերկրյա քաղաքացիները ԲՈՒՀ են ընդունվում պատկան մարմինների գիտությամբ և թույլտվությամբ։ Համալսարանը ընդամենը ներկայացնում է դիմորդի անձնական գործը։

 

Իսկ քննչական մարմինը քննություն է վարում 3 տարի առաջ համալսարանից հեռացված ուսանողի հարցով, որի վերաբերյալ մենք ներկայացրել ենք պահանջվող բոլոր փաստաթղթերը։ Դեպքը մանրամասն չենք ներկայացնում, հարգելով նախաքննության գաղտնիությունը և անմեղության կանխավարկածը, ինչը, կարծում ենք, պետք է հաշվի առնեին այդ տեղեկությունները ձեզ հանձնած մարմինները»։

 

«Հայբուսակ» համալսարանի հասարակայնության հետ կապերի և լրատվության բաժին

Լրահոս

Ֆոտոռեպորտաժ

«Երևանյան գույներ»

Հարցումներ